काठमाडौँ, १२ माघ । स्वेदशी उत्पादक तथा पैठारीकर्ताहरुले प्रविधिजन्य स्वास्थ्य सामग्री तथा उपकरणको विवरण उपलव्ध गराउनुपर्ने भएको छ । 

 औषधी व्यवस्था विभागले  स्वेदशी उत्पादक तथा पैठारीकर्ताहरुलाई प्रविधिजन्य स्वास्थ्य सामग्री तथा उपकरणको विवरण उपलव्ध गराउन थप १५ दिनको समय दिएको छ ।

यसअघि विभागले १४ पुसमा सूचना जारी गर्दै स्वदेशी उत्पादक तथा पैठाकरीकर्तालाई एक साता भित्र विवरण उपलव्ध गराउन समय दिएको थियो । 

विभागले प्रविधिजन्य स्वास्थ्य सामग्री तथा उपकरणको उत्पादन, निकासी, पैठारी वा बिक्री बितरणमा गुणस्तर कायम गर्न र सोको प्रभावकारी अनुगमन तथा निरीक्षण सम्वन्धी काम कारवाहीलाई व्यवस्थित गर्न बनेको प्रविधिजन्य स्वास्थ्य सामग्री तथा उपकरण सम्बन्धि निर्देशिका २०७४ बमोजिम विवरण माग गरेको हो ।

त्यसमा अर्थोपेडिक इम्प्लान्ट, इनभिट्रो डाइग्नोस्टिक, अपरेसन थेटरमा प्रयोग हुने स्वास्थ्य सामग्रीका साथ कार्डियोभास्कुलर, सर्जिकल कमोडिटिज लगायतका सामग्रीहरु रहेका छन् ।

विभागले आइतबार जारी गरेको सूचनामा गत १४ पुसको सूचना अनुसार अधिकांश स्वदेशी उत्पादक तथा पैठारीकर्ताबाट विवरण उपलव्ध भईसकेको र केही स्वदेशी उत्पादक तथा पैठारीकर्ताले उक्त सूचना प्राप्त नगरेका कारण विवरण अध्यावधिक गर्न नसकेकोले म्याद थप गरिएको भनिएको छ ।