काठमाडौ,१६ मंसिर । सिंगापुरमा विश्वभरीका क्यान्सर रोग विशेषज्ञहरुको सम्मेलन सुरु भएको छ । 

 युरोपियन सोसाइटी अफ मेडिकल अंकोलोजिष्टको आयोजनामा भएको सम्मेलन सिंगापुरको सुनटेक कम्प्लेक्स हलमा सुरु भएको हो ।

तीन दिनसम्म सञ्चालन हुने उक्त  सम्मेलनमा सिंगापुर, अमेरीका, ब्राजिल, बेलायत, भारत, चीन, वंगलादेश, श्रीलंका, जापान, मेक्सिको लगायतका विश्वका सबै देशका क्यान्सर विशेषज्ञहरुको सहभागित रहेको छ । 

 नेपालबाट वरिष्ठ क्यान्सर रोग विशेषज्ञ डा. अरुण शाही क्यान्सर सम्बन्धि सम्मेलनमा भाग लिन जानुभएको छ । डा. शाहीले नेपालमा क्यान्सरको उपचारमा भएका प्रगतिबारे कार्यपत्र प्रस्तुत गर्ने कार्यक्रम रहेको छ । 
 क्यान्सर रोग विशेषज्ञ डा.शाहीले नेपालमा क्यान्सरको स्थिति कस्तो छ, नेपालमा क्यान्सर रोगीको अवस्था, क्यान्सर उपचारमा नागरिकको पहुँच, क्यान्सरको उपचारमा भएका नविनतम आयामबारे कार्यपत्र प्रस्तुत गर्दै हुनुहुन्छ । 

 डा.शाहीले दिनुभएको जानकारी अनुसार सम्मेलनमा क्यान्सर उपचारमा विश्वले गरेको प्रगति, विकशित देश र विकासोन्मुख मुलुकमा क्यान्सर उपचारको क्षेत्रमा भएका प्रविधिको विकास, क्यान्सरलाई घटाउन अपनाउनुपर्ने रणनीति, क्यान्सर उपचारमा भित्रिएको नयाँ प्रविधि लगायतका विषयमा सम्मेलनमा छलफल हुने जानकारी दिनुभयो । 

 उक्त सम्मेलनमा विश्वबाट तीनहजार क्यान्सर रोग विशेषज्ञहरुको सहभागिता रहेको छ ।