काठमाडौ । स्वास्थ्य सेवातर्फ १२औँ तहमा बढुवा हुनका लागि २१ जनाको निवेदन परेको छ । निवेदन दिने आज अन्तिम दिन ११औँ तहका २१ जनाले निवेदन दिएका हुन् । २०७८ असार मसान्तसम्म न्यूनतम पाँच वर्ष सेवा अवधि पूरा भएका एघारौँ तहका अधिकृतहरूले बढुवाका लागि निवेदन दिएको स्वास्थ्य मन्त्रालयले जनाएको छ ।  अब बुढुवा समितिको सिफारिसमा मन्त्रिपरिषद् बैठकले बढुवाको निर्णय गर्नेछ । 

११औँ तहको बरियतामा पहिलो नम्बरमा योजना तथा अनुगमन महाशाखा प्रमुख डा. गुणराज लोहनी हुनुहुन्छ । दोस्रोमा व्यवस्थापन महाशाखामा रहनुभएका डा‍ भीमसिंह तिंकरी, तेस्रो बरियतामा सार्क क्षयरोग केन्द्रका निर्देशक रहेका डा. तारानाथ पोखरेल  हुनुहुन्छ ।चौथोमा डा.तारानाथ पौडेल हुनहुुन्छ । पौडेलविरुद्ध अख्तियार दुरुपयोग अनुसन्धान आयोगले विशेष अदालतमा रिट दायर गरेकाले उहाँ निलम्बनमा हुनुहुन्छ । 

त्यसपछिको बरियतामा स्वास्थ्य सेवा विभाग राष्ट्रिय स्वास्थ्य शिक्षा सूचना तथा सञ्चार केन्द्रका निर्देशक सुनीलराज शर्मा र इपिडिमियोलोजी तथा रोग नियन्त्रण महाशाखाका निर्देशक डा. कृष्णप्रसाद पौडेल हुनुहुन्छ । मन्त्रालयका अनुसार बढुवा गरिएका ३ जनामध्ये एक जनालाई मन्त्रालयमै जिम्मवारी दिने, एक जनालाई स्वास्थ्य सेवा विभागको महानिर्देशकमा र एक जनालाई वीर अस्पतालको निर्देशकको जिम्मवारी दिने तयारी छ ।