काठमाडौँ, ३० साउन । स्वास्थ्य बीमा कार्यक्रमअन्तर्गत बीमितलाई सेवा उपलब्ध गराएका देशभरका ३७६ स्वास्थ्य संस्थालाई तीन अर्ब ५६ करोड आठ लाख ९४ हजार ९६० रुपैयाँ ६९ पैसा भुक्तानी गरिएको छ।

स्वास्थ्य बीमा बोर्डले २०८२ साल माघ र फागुन महिनामा बीमितलाई उपलब्ध गराइएको स्वास्थ्य सेवाबापत उक्त रकम सम्बन्धित स्वास्थ्य संस्थालाई भुक्तानी गरेको हो। सेवा प्रदायक संस्थाले पेस गरेका दाबीको आवश्यक जाँच तथा मूल्याङ्कनपछि स्वीकृत रकम निकासा गरिएको बोर्डले जनाएको छ।

भुक्तानी प्राप्त गर्ने स्वास्थ्य संस्थामा सरकारी तथा निजी अस्पतालसँगै प्राथमिक स्वास्थ्य केन्द्र, नगर अस्पताल, जिल्ला अस्पताल, आधारभूत अस्पताल, आँखा अस्पताल र शिक्षण अस्पतालसमेत रहेका छन्। यसबाट स्वास्थ्य बीमा कार्यक्रममार्फत सहरी क्षेत्रका ठूला अस्पतालदेखि ग्रामीण तथा दुर्गम क्षेत्रका स्वास्थ्य संस्थासम्म सेवा प्रवाह भइरहेको देखिएको छ।

बीमा कार्यक्रममा आबद्ध स्वास्थ्य संस्थाले बीमितलाई उपलब्ध गराएको उपचार, परीक्षण, औषधि तथा अन्य सेवाको विवरणसहित दाबी पेस गर्ने व्यवस्था छ। प्राप्त दाबीको रुजु तथा मूल्याङ्कनपछि तोकिएको मापदण्डअनुसार स्वीकृत भएका सेवाको रकम सम्बन्धित संस्थालाई भुक्तानी गरिन्छ।

बोर्डका अनुसार सेवा प्रदायक स्वास्थ्य संस्थाबाट प्राप्त दाबीको परीक्षण गर्दा सेवा प्रवाह, बीमितको विवरण तथा उपचारसँग सम्बन्धित कागजातलगायत विषयलाई आधार बनाइन्छ। स्वीकृत दाबीका आधारमा मात्रै भुक्तानी हुने भएकाले स्वास्थ्य संस्थाले उपलब्ध गराएको सेवाको विवरण र दाबी प्रक्रियालाई व्यवस्थित बनाउनुपर्ने हुन्छ।

पछिल्लो भुक्तानीमा देशका विभिन्न जिल्लामा रहेका स्वास्थ्य संस्थालाई समेटिएको छ। ठूला अस्पतालमा मात्र नभई प्राथमिक, आधारभूत तथा जिल्ला तहका स्वास्थ्य संस्थासमेत समावेश भएकाले स्वास्थ्य बीमा कार्यक्रमको सेवा पहुँच स्थानीय तहसम्म विस्तार भएको बोर्डको दाबी छ।