काठमाडौं, २५ वैशाख । प्रमुख प्रतिपक्षी दल नेकपा एमालेले स्वतन्त्र सांसद डा. अमरेश कुमार सिंहको स्वास्थ्य परिक्षण गर्न माग गरेको छ । सभामुख देवराज घिमिरेले बोल्न समय नदिएको भन्दै स्वतन्त्र सांसद सिंह संसदमै अर्धनग्न हुनु भएको थियो । 
समाभुखको विरोध गर्दै सांसद सिंहले आफ्नो कोट, सर्ट र गन्जी खोलेर अर्धनग्न हुनु भएको थियो ।

त्यसपछि संसदको आकस्मिक समयमा बोल्दै एमालेका सांसद अच्युतप्रसाद मैनालीले संसदमा अर्धनग्न भएका सांसद सिंहको स्वास्थ्य जाँच गर्न माग गर्नुभएको हो ।
सभामुख देवराज घिमिरेले सांसद सिंहलाई अशिष्ट, अश्लिल र अपमानजनक व्यवहार नगर्न अनुरोध गर्दै प्रतिनिधिसभा नियमावलीको नियम ३० अनुसार चल्न आग्रह गर्नुभएको थियो । अनुशासित नभए सांसद सिंहमाथि अन्य कारबाही हुने चेतावनी पनि सभामुख घिमिरेले दिनुभयो । त्यसपछि सिंहले कपडा लगानुभयो ।

“समाभुख महोदय संसदमा जे गतिविधि देखा परेको छ ,यो लाजमर्दो छ,मैनालीले भन्नुभयो,"हाँ माननीय सदस्यको स्वास्थ्य जाँचको माग गर्छु” । आकस्मिक समयमा बोल्नुपर्ने माग गर्दै स्वतन्त्र सांसद सिंहले हात उठाउनु भएको थियो । तर, सभामुखले बैठकमा आकस्मिक समय र विशेष समय नरहेको र बैठक नियमित कारबाहीमा जाने भनेसँगै सांसद सिंहले आफ्नो सर्ट र भित्री गन्जी खोलेर विरोध जनाउनु भएको थियोे ।

त्यससँगै संसदमा अन्य दलका सांसदहरूले समेत बोल्न पाउनुपर्ने माग गर्नुभएको थियो ।