काठमाडौं,२८ मंसिर । उदयपुर सिमेन्ट उद्योग लिमिटेडका महाप्रबन्धक गोपीकृष्ण न्यौपानेको पदावधि थप भएको छ । 
उहाँ स्वास्थ्य क्षेत्रमा पनि क्रियाशिल हुनुहुन्छ । 
दुई वर्षे कार्यकालको लागि नियुक्त हुनुभएका महाप्रबन्धक न्यौपानेलाई सरकारले पुनः एक वर्षको लागि पदावधि थप गरेको हो । 
उदयपुर सिमेन्ट कारखाना नेपाल सरकारको पूर्णस्वामित्व रहेको उद्योग हो । 

२०७७ साल पुष २० गतेको मन्त्रीपरिषद्को निर्णयले उदयपुर सिमेन्ट उद्योगको महाप्रबन्धकमा न्यौपानेलाई नियुक्त गरेको थियो । उद्योग, वाणिज्य तथा आपूर्ति मन्त्रालय अन्तर्गतको सरकारी उद्योग तथा संस्थान शाखाले बुधवार न्यौपानेलाई एक वर्षको कार्यकाल थप गरेको जानकारी गराएको छ । 
पत्रमा ‘नेपाल सरकार, मन्त्रिपरिषद्को मिति २०७७ /०९/२० को निर्णय अनुसार उदयपुर सिमेन्ट उद्योग लिमिटेडको महाप्रबन्धक पदमा २ वर्षको लागि तपाइलाई नियुक्त गरिएकोमा उद्योग, वाणिज्य तथा आपूर्ति मन्त्रालय सम्बद्ध सार्वजनिक निकायमा पदाधिकारी नियुक्त तथा मनोनयन सम्बन्धी निर्देशिका, २०७८ को अनुसूची ४ को क्रम सङ्ख्या १ र सोही निर्देशिकाको दफा ५ को व्यवस्था बमोजिम तपाइको पदावधि सुरु नियुक्तको निर्णय २०७७/०९/२० बाटै लागू हुनेगरि तीन वर्षको कायम गरिएको ब्यहोरा नेपाल सरकार, मन्त्रिपरिषद्को मिति २०७९/०६/०७ को निर्णयअनुसार अनुरोध गरिन्छ ।’  

 उद्योगले आर्थिक वर्ष २०७६ र ७७ सम्म साढे पाँच अर्ब सञ्चित नोक्सानी  व्यहोरेको थियो । तर, महाप्रबन्धकका रूपमा न्यौपाने आइसकेपछि उद्योग नाफामा  गएको छ ।
 पहिले दैनिक चार हजार बोराभन्दा कम सिमेन्ट उत्पादन गर्दै आएकोमा न्यौपाने नेतृत्वमा आइसकेपछि आर्थिक वर्ष २०७८ /७९ मा सात हजार चार सय बोरा सिमेन्ट उत्पादन गरेको थियो ।