काठमाडौं । स्वास्थ्य तथा जनसंख्या राज्यमन्त्री हीराचन्द्र केसीले लामो समयदेखि स्वास्थ्यकर्मी तथा कर्मचारीहरुले करारमा काम गरिरहेको भन्दै  करारमा काम गर्ने बाध्यताको हल गर्न पहल गर्ने बताउनुभएको छ ।  
भक्तपुरस्थित शहिद धर्मभक्त राष्ट्रिय प्रत्यारोपण केन्द्र र भक्तपुर क्यान्सर अस्पतालको अनुगमनका क्रममा अस्पतालमा कार्यरत कर्मचारीले वर्षौदेखि करारमा काम गरिरहेको बताएपछि राज्यमन्त्री केसीले करारको समस्या समाधान गर्न पहल गर्ने बताउनुभएको हो । 
 अनुगमनका क्रममा उहाँल विरामीमैत्री सेवा प्रबाह गर्न निर्देशन दिनुभयो ।  प्रत्यारोपण केन्द्रको अनुगमन गर्दै मन्त्री केसीले डायलासिस सेवा लिन र मिर्गौला प्रत्यारोपणमा पालो कुर्नुपर्ने अवस्था रहेको भन्दै यसको अन्त्य गर्न पनि निर्देशन दिनुभयो । 
अहिलेपनि सजिलैसंग केन्द्रबाट डायलायसिस गर्न कठिनायी हुने भन्दै उहाँले प्रत्यारोपणको लागि पालो कुर्नुपर्ने अवस्थाको पनि अन्त्य गरिनुपर्ने बताउनुभयो । 
प्रत्यारोपण केन्द्रमा नाम टिपाएका सबैको पालो आउन समय लाग्ने समस्याको हल गर्नका लागि आफूले सहयोग गर्ने उहाँको भनाइृ थियो । 
 राज्य मन्त्री केसीले भक्तपुर क्यान्सर अस्पतालको अनुगमन गर्दै चिकित्सहरु सीमित स्रोत साधनका बाबजुत रातदिन खटेर सेवा प्रवाह गरेको बताउनुभयो । 
भक्तपुर क्यान्सर अस्पतालमा ५ सय शैया आवश्यक रहेको उहाँको भनाई छ । अस्पतालको स्तरवृद्धि गर्न आफूले पहल गर्ने उहाँको भनाई छ । 
सो अवसरमा कर्मचारीहरुले लामो समयदेखि करारमा काम गर्न बाध्य भएको भन्दै अस्पतालको गठन आदेश परीमार्जन गर्न स्वास्थ्य राज्य मन्त्रीको ध्यानाकर्षण गराएका थिए ।