काठमाडौं । आजबाट कर्णाली स्वास्थ्य विज्ञान प्रतिष्ठानले चिकित्सा शिक्षामा स्नातक अध्ययन गराउन सुरु गरेको छ । 
चिकित्सा शिक्षा आयोगले पहिलो पटक स्नातक तहमा अध्ययन गराउन स्वीकृति दिएपछि प्रतिष्ठानले आजबाट स्नातक तहमा अध्ययन गराउन सुरु गरेको हो । 
कर्णाली स्वास्थ्य विज्ञान प्रतिष्ठानका उपकुलपति डा. मंगल रावलले आजबाट अभिमुखिकरण सुरु गरिएको जानकारी दिनुभयो । उहाँले औपचारिक रुपमा भने मंसिर २६ गतेदेखि नियमित अध्ययन सुरु हुने जानकारी पनि दिनुभयो । 
चिकित्सा शिक्षा आयोगले चिकित्सा शास्त्रतर्फ स्नातक तह (एमबीबीएस)मा भर्नाका लागि २० सिट तोकिदिएको छ । आयोगले तोके अनुसार भर्ना लिई आजबाट पढाइ सुरु भएको हो । 

कर्णाली स्वास्थ्य विज्ञान प्रतिष्ठानमा पहिलो पटक एमविविएस सुरु भएको हो । एमविविएस सहित वि फार्मा,स्नातक तहमा नर्सिङ र जनस्वास्थ्यको लागि अध्ययन सुरु भएको छ ।  
चिकित्सा शिक्षा आयोगले कर्णाली स्वास्थ्य विज्ञान प्रतिष्ठानलाई यो वर्षबाट एमविविएसमा २० जना भर्नाका लागि सिट संख्या निर्धारण गरेको थियो । 
यस्तै वि फर्मा,विएन नर्सिङमा पनि आयोगल २० जना पढाउन पाउने गरी मान्यता दिएको छ । 
उहाँले २० सिटमध्ये  १५ सिट पूर्ण छात्रबृत्तिको हुने छ भने पाँच सिट सशुल्कमा अध्ययन गराइने छ । 
यसअघि प्रतिष्ठानमा पिसिएल नर्सिङमा ४० जना, हेल्थ असिष्टेन्टमा ४० जना, एनेस्थेसिया असिष्टेन्ट,एमडिएमएस र  एमडिजिपीमा समेत अध्ययन भइरहेको थियो ।