ओखलढुंगा, १३ माघ । ओखलढुंगास्थित चिसंखुगडी गाउँपालिकामा एक दम्पतिको गएराती लुटपाट पछि  हत्या गरिएको छ ।

 हत्या हुनेमा चिसङ्खुगढी गाउँपालिका वडा नम्बर ६ भदौरेका अन्दाजी ८० वर्षीय वृद्ध  चन्द्रविक्रम राई र उहाँको  श्रीमती चन्द्रमाया राई हुनुहुन्छ ।

गाउँमा खुद्रा पसल सञ्चालन गर्दै आउनुभएका राई दम्पतिको लुटपाट पश्चात हत्या गरेका हुन् ।

 चिसङ्खुगढी गाउँपालिकाका प्रमुख निसान्त शर्माले राई दम्पतिको हत्या भएको पुश्टि गर्दै   चिशंखुगढ़ी ६ भदौरे बोहोरे निवासी सामाजिक व्यक्तित्व चन्द्र बिक्रम राई दम्पतिको गएराति लुटपाट पछी हत्या भएको बताउनुभयो ।

यो निरन्तर घटना शृंखलाले जनमानसमा भय उत्पन्न भएको छ,शर्माले भन्नुभयो,"घटनाको गहिरो अनुसंधान गरि दोषी उपर कड़ा कार्वाहीको माग गर्दछु।" 
उहाँले अपराधको यस्ता निरन्तर शृंखलाले सुरक्षा चुनौती थपेको जानकारी दिनुभयो ।

वडा नम्बर ६ का वडा अध्यक्ष बलराम कटवालले राई दम्पतिको हत्या भएको जानकारी दिनुभयो । आज बिहानै पसलमा स्थानीय सामग्री खरिद गर्न जाने क्रममा हत्या भएको देखेपश्चात हल्ला भएको थियो । 

घटनाबारे जानकारी प्राप्त हुनासाथ  जिल्ला प्रहरी कार्यालय ओखलढुंगाको टोली घटनास्थलमा पुगेको छ ।

घटनाबारे जानकारी हुनासाथ घटनास्थल वरपर स्थानीयहरू भेला भएका छन् । वडा अध्यक्ष घटनास्थलमा पुगेर घटनाको बारेमा प्रहरीलाई जानकारी गराउनुभएको थियो ।

 
केही दिन अगाडि मात्रै जिल्लाको भदौरेमा एक दम्पतिको हत्या पश्चात फरार रहेका अपराधिक समूहका चार जनालाई प्रहरीले पक्राउ गरेको थियो ।