काठमाडौँ? १७ भदौ । स्वास्थ्य शिक्षा सूचना तथा सञ्चार केन्द्रमा कार्यरत शिला श्रेष्ठले अवार्ड प्राप्त गर्नुभएको छ । 

 स्वास्थ्यखबर हेल्थ अवार्ड अन्तर्गत ‘उत्कृष्ट स्वास्थ्य शिक्षा प्रवर्धक’ अवार्ड   विधामा श्रेष्ठलाई अवार्ड प्रदान गरिएको हो । 

स्वास्थ्य शिक्षामा आवश्यक सन्दर्भ सामग्री, प्रस्तुति, सन्देश र सूचना निर्माणका लागि सबैले सम्झिने पात्र शिला श्रेष्ठ भएकोले उहाँलाई अवार्ड प्रदान गरिएको हो । 

श्रेष्ठले२०७१ साल वैशाख १० गतेबाट नेपाल सरकारको सेवामा स्वास्थ्य शिक्षा अधिकृतको रूपमा प्रवेश गर्नुभएको थियो । 

त्यसको दुई वर्षपछि, २०७३ सालमा स्वास्थ्य शिक्षा प्रशिक्षकमा नाम निकालेर उहाँ स्वास्थ्य तथा जनसंख्या मन्त्रालय, राष्ट्रिय स्वास्थ्य शिक्षा, सूचना तथा सञ्चार केन्द्रमा पुग्नुभएको थियो । 

स्वास्थ्य सम्बन्धी सामग्री विद्यालय तहका पाठ्यपुस्तकमा समावेश गर्न केन्द्रले निरन्तर प्रयास गर्दै आएको छ। शाखा प्रमुखको रूपमा शिला श्रेष्ठले यसमा विशेष जोड दिनुभएको छ । 

नसर्ने रोग, धुम्रपान, सूर्तीजन्य पदार्थजस्ता विषयसहित मानसिक स्वास्थ्य, आत्महत्या जस्ता संवेदनशील विषय पनि पाठ्यक्रममा राख्न उनी निरन्तर सक्रिय हुनुहुन्छ ।

यदि यी विषय समावेश भए, ८० हजारभन्दा बढी विद्यार्थीलाई सामग्री पुग्नेछ। विद्यार्थीमार्फत घर–घरमा पनि स्वास्थ्य सन्देश पुर्‍याउन सकिने अपेक्षा छ श्रेष्ठले भन्नुभयो ।