काठमाडौं, ३२ साउन। मङ्कीपक्सको प्रकोप फैलिएपछि विश्व स्वास्थ्य सङ्गठन (डब्ल्यूएचओ) ले विश्वव्यापी सार्बजनिक स्वास्थ्य संकटकालको घोषणा गरेको छ ।

 अफ्रिकाका केही भागहरूमा मङ्कीपक्स अर्थात एमपक्स को प्रकोप फैलिएपछि (डब्ल्यूएचओ) ले संकटकालको घोषणा गरेको हो ।

मङ्कीपक्स कंगोबाट सुरु भएर १३ देशमा फैलिसकेको छ । अहिले सम्म यो रोगबाट ५१७ जनाको ज्यान गइसकेको छ ।

अत्यधिक सङ्क्रामक रोग एमपक्सका कारण कङ्गोमा ४५० जनाको ज्यान गएको छ । अहिले यो सङ्क्रमण मध्य र पूर्वी अफ्रिकामा फैलिरहेको छ । 

वैज्ञानिकहरूले यस रोगको नयाँ भेरियन्ट तीव्र फैलिरहेको र यसको उच्च मृत्युदरलाई लिएर चिन्ता व्यक्त गरेका छन ।

विश्व स्वास्थ्य संगठनका प्रमुख टेड्रोस गेब्रेयससले अफ्रिका र त्यसभन्दा बाहिर यो रोग फैलिने सम्भावनाप्रति चिन्ता व्यक्त गर्नुभएको छ ।

अन्तर्राष्ट्रिय सहयोगले मात्र यो रोग रोक्न सकिन्छ र जनताको जीवन बचाउन सकिन्छ उहाँले भन्नुभएको छ ।

मानिसहरूलाई बिफर गराउने प्रजातिको भाइरसबाट मङ्कीपक्स सङ्क्रमण हुन्छ । यो भाइरस सबैभन्दा पहिले जनावरबाट मानिसमा सरेको भए पनि अहिले मानिसबाट मानिसमा पनि सर्ने गरेको छ ।

मङ्कीपक्सको प्रारम्भिक लक्षणमा ज्वरो आउने, टाउको दुख्ने, सुन्निने, ढाड दुख्ने र मांसपेशी दुख्ने असर देखा पर्छन् ।

ज्वरो उच्च भएपछि शरीरमा बिमिराहरू देखा पर्न सक्छन् । यो अनुहारबाट शुरू भएर शरीरका अन्य भागमा फैलिन्छ । बिमिराहरू निकै चिलाउने वा दुख्ने हुन सक्छ ।
मङ्कीपक्सको सङ्क्रमणबाट आँखामा सङ्क्रमण भई दृष्टि गुम्ने, निमोनिया हुने र ज्यान पनि जान सक्छ ।