काठमाडौं, १२ मंसिर  ।  चितवनस्थित भरतपुर अस्पताल देशभरिमा उत्कृष्ट अस्पताल घोषित भएको  छ। 

यस वर्षको कार्य सम्पादन मूल्यांकनमा भरतपुरले ८८ अंक प्राप्त गर्दै गुणस्तरीय सेवा प्रवाहमा उल्लेखनीय प्रगति गरेको छ।

स्वास्थ्य मन्त्रालयले संघीय अस्पतालहरूको न्यूनतम सेवा मापदण्ड मूल्यांकन गरेको नतिजा अनुसार भरतपुर अस्पताल देशभरिमै उत्कृष्ट हुन सफल भएको हो ।

नीति, योजना तथा अनुगमन महाशाखा प्रमुख डा. कृष्णप्रसाद पौडेलले राष्ट्रिय संयुक्त वार्षिक समीक्षा गोष्ठीमा भरतपुर अस्पतालले गुणस्तरीय स्वास्थ्य सेवा प्रदानमा उच्चस्तर हासिल गरेको जानकारी दिनुभयो।

मूल्यांकन अनुसार बाँकेको भेरी अस्पताल दोस्रो स्थानमा ८३ अंक, पाटन स्वास्थ्य विज्ञान प्रतिष्ठान ७९, बीपी कोइराला स्वास्थ्य विज्ञान प्रतिष्ठान धरान ७५, डडेल्धुरा अस्पताल ७३ र राप्ती स्वास्थ्य विज्ञान प्रतिष्ठान ७१ अंक प्राप्त  गरेका छन्।

राष्ट्रिय स्तरका प्रमुख अस्पतालहरूमा वीर अस्पताल ६७, परोपकार प्रसूति तथा स्त्रीरोग अस्पताल ६४, कोशी अस्पताल ६३, शुक्रराज ट्रपिकल तथा सरुवा रोग अस्पताल ५९ र नारायणी अस्पताल ५६ अंक ल्याउन सफल भएका छन् ।

   डा. पौडेलका अनुसार यी अस्पतालहरू सुधारको प्रक्रियामा रहेका छन्।

तर सप्तरीको गजेन्द्रनारायण सिंह अस्पताल ३६ र पाटन मानसिक अस्पताल ३२ अंकसहित न्यूनतम मापदण्ड पुरा गर्न कमजोर देखिएका छन्।

मन्त्रालयका अनुसार मूल्यांकनमा क्लिनिकल सेवा, नर्सिङ सेवा, अस्पताल प्रशासन, संक्रमण नियन्त्रण र औषधि व्यवस्थापनसमेत ९० भन्दा बढी सूचकहरू समावेश गरिएको छ।

डा. पौडेलले भन्नुभयो, ‘नागरिक अस्पतालसम्म पुगेका छन्, तर स्वास्थ्य प्रणालीले गुणस्तरीय सेवा प्रदान गर्न सकेको छैन।

यस वर्ष मूल्यांकनमा १३ संघीय अस्पतालहरूलाई समेटिएको थियो। कम अंक ल्याएका अस्पतालहरूलाई मन्त्रालयले तत्काल सुधार योजना पेश गर्न निर्देशन दिएको छ।