काठमाडौँ, २० वैशाख । मन्त्रिपरिषद् बैठकले स्वास्थ्यमा एक हजार अस्थायी जनशक्ति थप्ने निर्णय स्वीकृत गरेको छ ।

स्वास्थ्य बीमा बोर्डको दाबी भुक्तानी मूल्याङ्कन गर्न जनशक्ति अभावमा देखिएको समस्या हल गर्न अस्थायी दरबन्दी थप गर्न गरेको प्रस्ताव मन्त्रीपरिषदले स्वीकृत गरेको हो। थप भएको दरबन्दी स्वास्थ्य बिमा बोर्ड र विभिन्न अस्पतालका लागि थपिएको हो ।

स्वास्थ्य तथा जनसंख्या मन्त्री प्रदीप पौडेलले उक्त प्रस्ताव मन्त्रीपरिषदमा लानुभएको थियो ।

गत बुधबार बसेको मन्त्रिपरिषद् बैठकबाट बोर्डका लागि चार सय दुई जना जनशक्ति थपिने भएका छन् । बोर्डका लागि मन्त्री पौडेलले अधिकृतस्तरका ५६ जना तथा सहायकस्तर र श्रेणीविहीन तीन सय ४६ जना जनशक्तिको अस्थायी दरबन्दी स्वीकृतिका लागि प्रस्ताव लानुभएको थियो ।

हाल बोर्डमा जनशक्ति अभावमा गत साउनसम्मको दाबीमा मात्र मूल्याङ्कन सकिएको छ । बोर्डका कार्यकारी निर्देशक डा. रघुराज काफ्लेले थपिएका अस्थायी जनशक्तिले चालु आवभित्रै बाँकी दाबीमा मूल्याङ्कन सक्ने लक्ष्यमा सघाउने बताउनुभयो ।

यसले ती अस्पतालहरूले सञ्चालनमा खेपिरहेको समस्या समाधानमा सहजता ल्याउने विश्वास गरिएको मन्त्रालयका प्रवक्ता डा. प्रकाश बुढाथोकीले बताउनुभयो । ‘संगठन तथा व्यवस्थापन संरचनाको काम नसकिँदासम्म यसले सेवा सञ्चालनमा बोर्ड र अस्पतालहरूमा सहजता आउने विश्वास गरिएको छ,’ उहाँले भन्नुभयो  ।