धनगढी,२२ मंसिर ।  धनगढीस्थित गेटा आँखा अस्पतालले सञ्चालन गरेको एक दिने आँखा स्वास्थ्य शिविरमा ६७८ जनाले आँखा परीक्षण गराएका छजन् ।

कञ्चनपुरको बेलडाँडी गाउँपालिकामा भएको उक्त शिविरमा नेपाल नेत्रज्योति संघ अन्र्तगतको गेटा आँखा अस्पताल र बेलडाँडी गाउँपालिकाको संयुक्त आयोजना तथा रुईत फाउन्डेशनको सहयोगमा मंसिर २० गते सम्पन्न भएको हो ।

रौलेश्वर जनता बहुमुखी क्याम्पसमा सञ्चालन भएको शिविरमा १०४ जनालाई निःशुल्क मोतिबिन्दु शल्यक्रियाका लागि गेटा आँखा अस्पताल पठाइएको छ ।

अरु आँखाका बिरामीलाई शिविरमै निःशुल्क औषधि उपचार प्रदान गरिएको छ । २०३ जनालाई निःशुल्क चश्मा वितरण गरिएको छ ।

उपचारका लागि अस्पताल पुग्न कठिनाइ भएका तथा आर्थिक अभावले सेवा नपाएका स्थानीयका लागि शिविर लाभदायक बनेको जनाइएको छ । गेटा आँखा अस्पतालका बाह्य कार्यक्रम प्रमुख तथा वरिष्ठ नेत्र अधिकृत रमेश चन्द्र भट्टको नेतृत्वमा गेटा आँखा अस्पताल र आँखा अस्पताल महेन्द्रनगरका ११ जनाको टोलीले सेवा प्रदान गरेको थियो ।

शिविर व्यवस्थापनमा बेलडाँडी गाउँपालिकाका जनप्रतिनिधि, कर्मचारी, महिला स्वास्थ्य स्वयंसेविका तथा नेपाल प्रहरीका सुरक्षाकर्मीले सक्रिय भूमिका निर्वाह गरेका थिए ।

प्रदेशभर अन्धोपन न्यूनीकरणका लागि गेटा आँखा अस्पतालले ९ जिल्लाका २९ शाखामार्फत नियमित सेवा दिँदै आएको छ । 

यस्तै  विभिन्न संस्थाको सहकार्यमा वर्षमा ५० भन्दा बढी स्थानमा आँखा शिविर सञ्चालन गर्दै सेवा पहुँच विस्तार गरिरहेको अस्पतालले जनाएको छ ।