काठमाडौँ, २० वैशाख । स्वास्थ्य तथा जनसंख्या मन्त्रालयले सञ्चालन अनुमति नलिएका एम्बुलेन्सलाई सञ्चालनमा रोक लगाउने भएको छ । 
मन्त्रालयले नवीकरण नभएका  एम्बुलेन्सलाई समेत सञ्चालनमा रोक लगाउने भएको छ ।
मन्त्रालयले सञ्चालन अनुमति नलिएका वा नवीकरण नगरेका एम्बुलेन्सहरुलाई ३५ दिन भित्र अनुमति लिन वा नवीकरण गर्न निर्देशन दिएको छ ।

स्वास्थ्य तथा जनसंख्या मन्त्रालयले आज सूचना जारी गर्दै तोकिएको अवधी भित्र अनुमति नलिई वा नवीकरण नगरी सञ्चालन गरिएको पाईए कानून बमोजिम कारवाही गरिने समेत चेतावनी दिएको छ ।

राष्ट्रिय एम्बुलेन्स निर्देशिका २०७८ को दफा ७ मा एम्बुलेन्स अनुमति तथा दफा ९ मा हरेक दुई दुई वर्षमा सञ्चालन अनुमति नवीकरण गर्नु पर्ने व्यवस्था छ । तर यस व्यवस्थालाई वेवास्ता गर्दै कतिपय सञ्चालकहरुले निर्वाध रुपमा एम्बुलेन्स सञ्चालन गर्दै आएका छन् ।

त्यसो त निर्देशिकाले देशभर सञ्चालनमा रहेका एम्बुलेन्सहरुलाई एकद्धार प्रणालीबाट सञ्चालन गर्ने, त्यसका लागि देशभर १०२ अंङ्कको टेलिफोन नम्बरबाट एम्बुलेन्स सेवा प्राप्त गर्ने व्यवस्था उल्लेख छ ।
 
त्यसबाहेक अब सञ्चालन हुने एम्बुलेन्स निर्देशिकामा तोकिएको मापदण्ड, जीपीएस जडान भएको हुनुपर्नेछ । त्यसले कुन एम्बुलेन्स कहाँ छ, भनेर थाहा हुने र नजिकको बिरामीलाई छिटो गरी सेवा पुरयाउन सहज हुने बताइएको छ ।

कानूनले राजश्व छुटमा भित्रिएका एम्बुलेन्सहरु १० बर्ष पछि चल्न पाउँदैनन् । 
अहिलेसम्म जीपीएस जडान गर्ने एम्बुलेन्स ६ सयको हाराहारीमा रहे पनि सफ्टवेरमा आवद्धता हुने एम्बुलेन्स ८१ वटा मात्रै रहेको मन्त्रालयले जनाएको छ ।

हरौँ सूचना